භග්න චිකිත්සාව හෙවත් කැඩුම් බිඳුම් වෙදකම

මේ වෙදකම අයත්වනුයේ ශල්‍ය අංශයටයි. මෙම වෙදකම ගැමියන් අතර වඩාත් ප්‍රචලිතව ඇත්තේ ගස් වෙදකම යනුවෙන්. එයට හේතුව වනුයේ ගස්වල කොටස් උපයෝගී කරගෙන සකසාගනු ලබන ඖෂධ වලින් මෙම වෙදකම කරන නිසාවෙන්.

අදටත් විස්මිත වෙදකමක් වන කැඩුම් බිඳුම් වෙදකම මෙන් අතීතයේ සිටි දක්ෂ වෛද්‍යවරුන් බිඳී හෝ කැඩී ගිය අස්ථි සම්පූර්ණයෙන් ඉවත්කර ඒ වෙනුවට කුකුළු ඇට, එළු ඇට බද්ධකර අස්ථි සන්ධානය කර තිබෙනවා.

කැඩුම් බිඳුම් වෙදකමේ විශේෂිත අංගය වනුයේ ඒ සඳහා යොදන ඖෂධීය උපක්‍රමයින් ඒවා තෙල් ගැල්වීම්, මැල්ලුම්, පත්තු, පැණිපත්තු, කිරිමැටි පත්තුව, අංකුඩු පත්තුව, තැම්බුම, තෙල්තිර ලෙස හැඳින්වෙනවා.

කැඩී බිඳී ගිය අස්ථියක් නිවරදිව සවිනොවී ඇති විටක, එම අස්ථිය කඩා නැවත නිවරදිව සවිකරන බවට මතයක් කැඩුම් බිඳුම් වෛද්‍ය ක්‍රමය ආශ්‍රිතව ගොඩනැගී තිබෙනවා. මෙය සත්‍යයක්ද ?

එය සම්පූර්ණයෙන් ම අසත්‍යයක් කැඩුම් බිඳුම් වෙදකම ආශ්‍රිතව අස්ථි කැඩීමක් හෝ බිඳීමක් සිදුවන්නේ නෑ. මෙම වෛද්‍ය ක්‍රමය තුළ ඇත්තේ එක් මූලික සිද්ධාන්තයක් පමණයි. එය නම්, අස්ථි කැඩී බිඳීමක් වූ විට එය නිවරදිව නැවත සවිකිරීම සහ වැරදි ආකාරයට සවිවී ඇති අස්ථියක් එයින් මුදා නිවරදි ආකාරයට සවිකිරීමයි. අස්ථි කැඩීමක් සිදුවන බවට වන වැරදි මතය ගොඩ නැගී ඇත්තේ ඉහත දෙවන කරුණ මත පදනම්වයි.

සැබැවින්ම මෙහිදී කරනු ලබන්නේ වැරදියට සවවී ඇති අස්ථිය වටා තෙල් ගෑම සහ මැල්ලුම් බැඳීමයි. මෙමගින් එම ස්ථානයේ ඇතිවී තිබෙන තද ගතිය මිදී මොලොක් බවට පත්වෙනවා. ඉන්පසු එය නිවරදි ආකාරයට යළි සවිකරනු ලබනවා.

මෙම වෛද්‍ය ක්‍රමය හා බැඳුණු තවත් අංගයක් වනුයේ වෙදකම පිළිබඳ දැනුමක් නොමැති අයෙකුට වුවද, තමන්ටම කරගතහැකි ප්‍රතිකාරවිධි අඩංගුව පැවතීමයි. එදිනෙදා සිදුවන බරපතළ නොවන තැල්මට, උළුක්කුවට බැලතණ මැල්ලුම බැඳීම, ලුණු පාන්කඩය බැඳීම එවන් ප්‍රතිකාරයකි.

මේ වෙදකමට යොදාගන්නා ශාක මොනවාද ?

බෝඹු, කැටකැල, මී, අංකෙන්ද, එරමිණියා, රදලිය, කෑලිය, කොබ්බෑ, නවහන්දි, ගොනිකා, ඇට්ටමුරා, සාවදාන, අඹ, කොටකිඹුලා, මගුල්කරද, බැලතණ, ලුණුවරන යන ශාක ඉන් සමහරක්. මෙම ශාකවල ටැනින්, ටැනින් අමිල, සැපොනික් මර්පින්, ට්‍රයිටර්පීන්, බෝල්සම්, වාෂ්පශීලී තෙල්, කැල්සියම්, මැග්නීසියම්, පොස්පරස්, සල්පර් වැනි අස්ථි සන්ධානයට අවශ්‍ය ස්වභාවික රසායන මූලද්‍රව්‍ය අඩංගුවෙනවා.

මෙහිදී විශේෂයෙන් පැවසිය යුතු කාරණයක් තිබෙනවා. කැඩුම් බිඳුම් වෙදකම සහ ශරීරයට පිටතින් බෙහෙත් ගැල්වීමක් පමණක් සිදුකරන වෛද්‍ය ක්‍රමයක් නොව, ශරීර අභ්‍යන්තරයටද ඖෂධ ලබාදෙන වෙදකමක්. මෙම දෙක එකවර එකෙලෙස නිසිලෙස ක්‍රියාත්මක වීම අවශ්‍යයි. අනෙක් කාරණය වෛද්‍යවරයාගේ දායකත්වයට රෝගියාගේ සහයෝගය ද ලැබිය යුතුයි. වෛද්‍යවරයා ගේ නියමයන් මනාලෙස පිළිපැදීම රෝගය සම්පූර්ණයෙන් සුවකරගැනීමට අත්වැලක් වෙනවා.

කැඩුම් බිඳුම් අස්ථියක් සවිකළ විට නැවත කැඩීමක් සිදුවීමට තිබෙන ඉඩකඩ වැඩිද ?

ශරීර අභ්‍යන්තරයේ නැවෙන ස්ථාන එකිනෙකට සම්බන්ධ වී තිබෙන්නේ ශරීර අභ්‍යන්තරයේ නිපදවෙන තරලයක් සමගින්. මෙම තරලය නිසා අස්ථි එකිනෙක ගැටෙන විට වඩා මෘදු හා සියුම් බවක් දැනෙනවා. ලෙහෙසියෙන් රිදීමක් ඇතිවන්නේ නෑ. යම් හෙයකින් අස්ථියක් පැනීම තුළ සිදුවනුයේ එම තරලය රහිත තැනක අස්ථිය පිහිටීමයි. මෙවිට නිවරදි නොවන අස්වාභාවික පිහිටීමක රැදෙන අස්ථිය වේදනා ගෙන දෙනවා. අස්ථියක් කැඩීම තුළින් සිදුවනුයේ ස්ථිර ලෙස එක දිගට තිබූ දෙයක් කැඩී වෙන්වීමක්. නොඑසේනම් පිපිරුමක්. එවිට එහි කෙටීමක් ඇතිවෙනවා. මෙයත් වේදනාකාරියි. කැඩුම් බිඳුම් වෙදකමින් කරනුයේ එම විකෘතික නිවරදිව සකසා යථා තත්ත්වයට පත්කිරීමයි.

හදිසියේ ඇතිවන තැල්ම, උළුක්කු, ඇමැට්ටි පැති ආබාධ සඳහා නිවසේදී පහසුවෙන් කළහැකි අත්බෙහෙත් කිහිපයක් සඳහන් කරන්න.

* අඹපොතු, බැලතණ, අමුකහ, දියුලුණු කැට, එකට කොටා ලිපිතබා මලවා ඔතන්න.

* හික්ගංග් පොතු, උළුහාල් මිටක්,, අමුකහ, දියලුණු, එකට කොටා ලිපතබා මලවා ඔතන්න.

* වරකා - කොස් ගස්වල පොතු, අඹපොතු, තොටිල පොතු, අමුකහ, දියලුණු, කොටා ලිප තබා මලවා ඔතන්න.

* හාතාවාරියා , කොළ, බැලතණ, ලපටි පුවක් මල්, අමුකහ, දියලුණු කොටා ලිපතබා මලවා ඔතන්න.

* කැටකෑල, මුණමල්, අංකෙන්ද, කොළ, පොතු, අමුකහ, දියලුණු කොටා ලිපිතබා මලවා ඔතන්න.

* ඔලිඳ කොළ කොටා එඬරු තෙල් දමා මිශ්‍රකර ලිපතබා මලවා ඔතන්න.

* පත්තු වශයෙන් රත්හඳුන් අරළු බුළු, නෙල්ලි, සිවාගුරු, තිත්ත අබිං, එකතරම ගෙන සියඹලා කොළ ඉස්මෙන් අඹරා එම ඉස්මෙන්ම ලිප තබා කකාරා ගාන්න.

* උඳුඇට තම්බා බිත්තර සුදුමදය සමඟ අඹරා ගාන්න.

* සෙවල බෝඹි පොතු, බිත්තර සුදුමදය, සමඟ ලිපතබා කකාරා ගාන්න.